Óskemende kópqabatty úıdegi órt bes balkonǵa jaıylyp, 7 adam qutqaryldy
ShQO tótenshe jaǵdaılar departamenti baspasóz qyzmetiniń málimetine súıensek, órt búgin Bitibaeva kóshesinde ornalasqan kópqabatty úıdiń ekinshi qabatynan shyqqan.
«Qyzyl jalyn joǵary qabattardyń balkondaryna tez tarap ketti. Búkil podez ishin qoıý qara tútin basty. Oqıǵa ornyna 6 mınýt ishinde jetken qutqarýshylar jedel túrde turǵyndardy evakýatsııalaýǵa kiristi. Áýeli podez ishindegi 5 azamat qaýipsiz jerge kóshirildi», - delingen aqparatta.
Odan soń órt sóndirýshiler 7 adamdy qutqardy, onyń ishinde 2-i múgedektigi bar jan, 2-i bala. Keıbir turǵyndardy qolmen kóterip syrtqa shyǵarýǵa týra kelgen.
«Órt bolǵan páterdegi 70 jastaǵy qarııanyń denesin kúıik shalǵan. Oǵan apattar medıtsınasy ortalyǵynyń jáne jedel járdem qyzmetkerleri alǵashqy kómek kórsetip, emhanaǵa jetkizdi. Kóp uzamaı 55 sharshy metr aýmaqqa jaıylǵan tilsiz jaý tolyqtaı sóndirildi», - delingen habarlamada.
Jalyn saldarynan 5 balkon búlindi. Órtti aýyzdyqtaýǵa barlyǵy 19 adam men 6 tehnıka jumyldyrylǵan. Aldyn ala derek boıynsha ottyń shyǵýyna – temeki shegý kezindegi abaısyzdyq sebep bolýy múmkin.