Óskemende kópqabatty úıde gaz jaryldy
ÓSKEMEN. QazAqparat – Óskemen qalasynda kópqabatty turǵyn úıdegi páterde qurylys jumystaryn júrgizý kezinde gaz jarylyp, 1 adam zardap shekti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, oqys oqıǵa 30 mamyr kúni Óskemendegi Slavskıı jaǵalaýy kóshesinde bolǵan. Besqabatty turǵyn úıdiń birinshi qabatyndaǵy páterde qurylys jumystaryn júrgizý kezinde gaz-aýa qospasy jaryldy. Sonyń saldarynan 1989 jylǵy er adam aýyr halde aýrýhanaǵa jetkizildi.
«Jarylystan 1-shi qabattan 5-shi qabatqa deıingi áınekter synyp, birinshi qabattaǵy syrtqy esik zaqymdaldy. Sol jerge shuǵyl kelip jetken TJD qyzmetkerleri úı turǵyndaryn qaýipsiz jerge kóshirdi. № 4 podezden 2 adam, № 3 podezden 11 adam evakýatsııalandy», - dep habarlady vedomstvo ókilderi.
Aıta keteıik, oqıǵa ornynda barlyǵy departamenttiń 25 qyzmetkeri men 7 tehnıkasy jumyldyrylǵan.
Esterińizge sala ketsek, osyǵan deıin ShQO-da 116 jaǵajaıda shomylýǵa tyıym salynǵanyn habarlaǵan edik.
