Óskemende kópqabatty úıden shyqqan órt kezinde 15 adam qutqaryldy
ASTANA. KAZINFORM — Shyǵys Qazaqstan oblysynyń Óskemen qalasynda kópqabatty turǵyn úıdegi páterden shyqqan órt kezinde 15 adam, onyń ishinde úsh bala qaýipsiz jerge evakýatsııalandy.
Tótenshe jaǵdaılar mınıstrliginiń málimetinshe, órt Býlvar Gagarın kóshesinde ornalasqan bes qabatty turǵyn úıdiń ekinshi qabatyndaǵy páterde shyqqan.
Oqıǵa ornyna jedel jetken órt sóndirýshiler qatty tútin basqan kireberisten qutqarý qalpaqtarynyń kómegimen 15 turǵyndy syrtqa alyp shyqty. Evakýatsııalanǵandardyń arasynda úsh bala bar.
— Órt 45 sharshy metr aýmaqty sharpyǵan. Mamandar tilsiz jaýdy tolyqtaı sóndirdi, — delingen habarlamada.
TJM turǵyndardy órt qaýipsizdigi talaptaryn qatań saqtaýǵa úndep, tótenshe jaǵdaı kezinde birden 112 nómirine habarlasýdy eskertti.
Eske salaıyq, buǵan deıin Shymkentte jıhaz tsehy órtengenin habarlaǵanbyz.
