Óskemende kómir shekti mólsherde ǵana berilip jatyr
ÓSKEMEN. Óskemenniń Sol jaǵalaý yqsham aýdanyndaǵy qoımada turǵyndarǵa kómir 3 tonnadan ǵana berilip jatyr, dep habarlaıdy QazAqparat tilshisi.
Óskemen qalasy men Zyrıan, Aıagóz aýdandarynda kómir satýmen aınalysatyn «VEÝS» JShS qara otynnyń ár tonnasyn 8 myń teńgeden satýda. Seriktestik dırektory Ivan Tımofeev kómir baǵasynyń byltyrǵy deńgeıde qalǵanyn aıtady. Tek, uzynsonar kezekte turǵan kóliktiń árbireýine 3 tonnadan ǵana tıeýge ruqsat etilgen.
«Qarajyra kenishi kómirdi kelisimshartta kórsetilgen mólsherde bosatpaı otyr. Kelisim boıynsha kenish bizdiń ıeligimizdegi 14 orynǵa 18 vagon jetkizip berýi kerek bolǵan. Onyń ornyna 11 vagon kómir tústi. Sebebin bizge aıtqan joq. Qalǵan eki qoımadaǵy jaǵdaı da osyndaı. Sondyqtan ár kólikke 3 tonna ǵana kómir tıeýge májbúrmiz», - deıdi Ivan Tımofoeev.
«Men Q.Qaısenov kentinen keldim. 10 shaqyrym jerden kelip turyp, úsh-aq tonna kómir áketý qaltaǵa salmaq salady. Kóliktiń jaldaý aqysynyń ózi 15-20 myń teńge. Sonyń kesirinen qara otynnyń ár tonnasy bizdiń aýlaǵa eki ese baǵamen jetip jatyr. Kúnde osy. 30-40 mashına kezekte turady», - deıdi Saıran Baıuzaqova esimdi turǵyn.
Bul másele qazirgi tańda qala ákimdigi men oblystyq energetıka jáne kommýnaldyq sharýashylyq basqarmasynyń da nazarynda.
«VEÝS» JShS-niń bizge bergen aqparaty boıynsha Qarajyra kenishi kelisimde kórsetilgen kómirdiń 2000 tonnasyn keshiktirýde. Osy máseleni anyqtaý úshin Óskemen qalasy ákiminiń orynbasary Erjan Qońyrbaev kenish basyna ketti. Kómirdiń tapshylyǵymen qosa sapasyna da syn aıtýshylar kóp. Jylý qazandyqtary tarapynan aýyzsha shaǵymdar túsken. Barlyq máseleniń mán-jaıyn Erjan Qońyrbaev anyqtaıtyn bolady», - deıdi energetıka jáne energııa únemdeý bóliminiń bas mamany Aıan Zamanbekov.
