Óskemende kólikpen qarsy jolaqqa shyǵyp vıdeo túsirgen 18 jastaǵy jigit jaýapqa tartyldy
ÓSKEMEN. KAZINFORM – Óskemen qalasynda kóligine tyıym salynǵan jaryqshamdar ornatyp, jol erejesin óreskel buzǵan júrgizýshi jaýapqa tartyldy.
ShQO Polıtsııa departamenti baspasóz qyzmetiniń málimetine súıensek, tekserýge quqyq buzýshynyń ózi áleýmettik jelide jarııalaǵan vıdeosy negiz boldy.
- Kadrlarda jeńil avtokólik júrgizýshisiniń qos tutas syzyqty kesip ótip, qarsy jolaqqa shyqqany jáne baǵdarshamnyń qyzyl túsine ótip ketý sııaqty qaýipti manevrler jasaǵany kóringen. Sondaı-aq ol zańda tyıym salynǵan qyzyl-kók tústi jaryqshamdardy paıdalanǵan, - delingen aqparatta.
Patrýldik polıtsııa batalonynyń qyzmetkerleri quqyq buzýshynyń kim ekenin jedel anyqtady. Ol Óskemenniń 18 jastaǵy turǵyny bolyp shyqty.
- Azamatqa qatysty birneshe bap boıynsha ákimshilik materıaldar toltyrylyp, sotqa joldandy. Túpkilikti sheshim qabyldanǵanǵa deıin onyń avtokóligi mamandandyrylǵan turaqqa qoıyldy. Er adam kólik quralyn basqarý quqyǵynan aıyrylýy múmkin, - delingen habarlamada.
Eske salsaq, osyǵan deıin Almatyda bir kúnde 30 kólik aıypturaqqa jetkizilgeni habarlanǵan.
