Óskemende kólikke soǵylǵan mototsıkl júrgizýshisi kóz jumdy

ÓSKEMEN. KAZINFORM – Óskemen qalasynda kólikke soǵylǵan mototsıkl júrgizýshisi kóz jumdy. ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy Menovnoe kentinde bolǵan.

«Zhejiang» markaly mototsıkldi tizgindep kele jatqan er adam «Toyota Land Cruizer» avtokóligine soǵyldy. Jol apaty saldarynan mototsıklshi aýyr jaraqat alǵan. Aýrýhanaǵa shuǵyl túrde jetkizilgen ol kóp uzamaı kóz jumdy.

«Qazirgi ýaqytta atalǵan fakti boıynsha sotqa deıingi tergeý amaldary bastaldy. Jol apatynyń barlyq mán-jaıy anyqtalyp jatyr. Birqatar sot-medıtsınalyq saraptama taǵaıyndalyp, sonyń qorytyndysy boıynsha protsessýaldyq sheshim qabyldanady», - dep habarlady vedomstvo ókilderi.

Eske salsaq, osyǵan deıin Óskemende kólik aǵashqa soǵylyp, 1 adam kóz jumǵany habarlanǵan.