Óskemende kólik júrgizýshileri jolǵa tóselgen bıtýmnyń dóńgelekti búldirgenine shaǵymdandy
ÓSKEMEN. KAZINFORM — Óskemen qalasynda kólik júrgizýshileri aýa raıynyń qolaısyzdyǵyna qaramastan jolǵa bıtým tóselgenine narazylyqtaryn bildirdi.
Qabanbaı batyr kóshesimen kele jatqan avtokólik júrgizýshileri barar jerine jetpeı toqtaýǵa májbúr boldy. Bul kezde jolǵa jańa asfalt tóseý jumystary júrgizilip jatqan.
— Jaýynnyń saldarynan jańa tóselgen bıtým kózge baıqalmaı qalǵan. Sonyń saldarynan kóligimniń dóńgelegi bıtýmǵa batyp, búlinip qaldy. Al bul qaltama salmaq, — deıdi kólik júrgizýshileriniń biri.
Osy máselege qatysty qala ákimdiginen jaýap berdi.
— Qabanbaı batyr kóshesinde ortasha jóndeý jumystary aıasynda asfaltbetonnyń ústińgi qabatyn tóseýdiń aldynda bıtým tógilgen. Alaıda aýa raıynyń qolaısyzdyǵyna baılanysty bul tehnologııalyq protsess ýaqytsha toqtatyldy. Birqatar júrgizýshiden bıtýmnyń shına men kólik shanaǵyna jabysyp qalýyna baılanysty shaǵym tústi. Bul másele merdiger uıym men júrgizýshiler arasynda sheshildi, — dep habarlady ákimdiktiń baspasóz qyzmetinen.
Vedomstvo dereginshe, jol jóndeý jumystary júrgizilip jatqan aýmaqta tıisti belgiler ornatylǵan.
— Júrgizýshilerge bul jermen júrgende jol belgilerine nazar aýdarý qajet. Jumystar aýa raıy qolaıly bolǵan kezde jalǵasady. Bıtým tógilgen jolda qozǵalysqa ýaqytsha tyıym salynǵan, — delingen aqparatta.
Eske salsaq, osyǵan deıin Batys Qazaqstanda 3 avtokólik soqtyǵysyp, júrgizýshi kóz jumǵany habarlanǵan.