Óskemende kólik keptelisin azaıtý úshin 5 mlrd teńge jumsalmaq
ÓSKEMEN. KAZINFORM – Óskemen qalasynyń kóshelerindegi, ásirese Ertis kópiri mańyndaǵy kólik keptelisi máselesi sheshilmek.
2025 jyly qalada eki iri kólik aıryǵyn salýǵa bıýdjetten 5 mlrd teńgeden astam qarjy bólinedi. Oblystyq máslıhat sessııasynda jol ınfraqurylymyn jaqsartý jospary bekitildi. Jańa joba aıasynda Óskemenniń kólik júıesinde strategııalyq ról atqaratyn Ertis kópiriniń eki jaǵynda jol aıryǵy salynbaq.
- Birinshisi Sátbaev dańǵyly men Jibek joly kósheleriniń qıylysynda bolady. Ekinshisi Jeńis dańǵyly, Slavskıı jaǵalaýy men Permıtına kóshelerin biriktiredi. Bul joba boıynsha jumys bastalyp ta ketken edi, biraq qarjy tapshylyǵyna baılanysty toqtatyldy, - dep habarlady qala ákimdiginen.
Osylaısha, qaladaǵy keptelis jıi bolatyn joldardyń negizgi ýchaskeleri qamtylyp, avtokólik júrgizýshileri joldaǵy ýaqyttaryn únemdeıdi.
Jol aıryqtarynyń qurylysy kelesi jyly bastalmaq.
Eske salsaq, osyǵan deıin ShQO-da skýter júrgizýshisin qaǵyp óltirgen er adam 2,5 jylǵa túrmege qamalǵany habarlanǵan.