Óskemende kólik eń kóp júretin qıylysta aınalma jol iske qosyldy

ÓSKEMEN. KAZINFORM – Óskemen qalasynda Sátbaev, Esenberlın dańǵyldary men Jibek joly, Bazovaıa kósheleriniń qıylysynda aınalma jol iske qosyldy. 

Bul jol aıryǵy qurylysynyń bastalýyna baılanysty týyndaǵan ýaqytsha ózgeris. Jobaǵa sáıkes, munda ekinshi deńgeıli jol bolady. Ol Sátbaev pen Esenberlın dańǵyldaryn baılanystyrady.

Aınalmaly qozǵalys engizilgennen keıin qurylysshylar bolashaq jol aıryǵynyń ekinshi deńgeıin ustap turatyn tirekterdi ornata bastaıdy. Barlyǵy 15 tirek bolmaq.

– Júrgizýshilerden ornatylǵan jol belgileri talaptaryn saqtaýdy suraımyz. Soǵan sáıkes, aınalma jol ishinde saǵatyna 30 shaqyrym jyldamdyqpen júrý kerek. Ertis kópirimen Sátbaev dańǵylyna qaraı kele jatqanda Jibek joly kóshesine qaraı túsýge múmkindik beretin oń jaq qosymsha burylys ashylǵan. Dál osyndaı burylys joldar Sátbaev dańǵylynan Bazovaıa kóshesine, Jibek joly kóshesinen Sátbaev dańǵylyna túsýge múmkindik beredi, - deıdi Óskemen qalalyq PB patrýldik polıtsııa batalony komandıriniń orynbasary Beıbit Mýsakanov. 

Tańerteń jáne keshke kólik aǵyny kóp bolǵan kezde Sátbaev pen Esenberlın dańǵyldarynda baǵdarsham qosylady. Polıtsııa qyzmetkerleri sol jerde baqylaý jáne halyqqa túsindirý jumystaryn júrgizedi. Qatelik jibergen júrgizýshilerge birden aıyppul salynbaı, ázirge eskertý jasalady.

Eske salsaq, buǵan deıin Shymkentte tranzıttik baǵyttaǵy sapasyz jol men keptelis turǵyndardyń ashýyn týǵyzǵany habarlanǵan.