Óskemende kólik turǵyn úıge soǵylyp, eki adam zardap shekti
ÓSKEMEN. QazAqparat – Óskemen qalasynda avtokólik turǵyn úıge soǵylǵan, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 9 qazan kúni saǵat 00.10-da jeńil kóliktiń 19 jastaǵy júrgizýshisi kópirden túsip bara jatqan kezde meteorologııalyq jaǵdaıdy eskermegendikten mashına syrǵanap ketken.
«Rýldi basqara almaı qalǵan júrgizýshi joldan shyǵyp ketken kúıi Nazarbaev dańǵylynyń boıyndaǵy turǵyn úıge soǵylǵan. Jaraqat alǵan 16 jastaǵy jolaýshy men 19 jastaǵy júrgizýshi qalalyq aýrýhanaǵa júgindi», - dep habarlady vedomstvo ókilderi.
Jol apaty saldarynan kópqabatty úıdiń birinshi qabatynda ornalasqan sulýlyq salonynyń ıesine materıaldyq shyǵyn keltirilgen. Júrgizýshige qatysty ÁQBtK-niń 610-babymen ákimshilik hattama toltyryldy.
