Óskemende kólik qozǵalysyn retteıtin sıtýatsııalyq ortalyq ashylady
ÓSKEMEN. QazAqparat - Óskemen qalasynda kólik qatynasy men qoǵamdyq tártip daýlaryn retteıtin sıtýatsııalyq ortalyq qurylady, dep habarlaıdy QazAqparat tilshisi.
Endi óskemendikter kólik apatynan keıingi daýlardy sıtýatsııalyq ortalyqqa júginý arqyly sheshe alady. Bul týraly jolaýshylar kóligi jáne avtomobıl joldary basqarmasynyń basshysy Nurjan Jumadilov arnaıy brıfıngte aıtty.
Basqarma basshysynyń aıtýynsha, Óskemen kóshelerin beınebaqylaý kameralarymen jabdyqtaý isi bıyl da jalǵaspaq. Shahardaǵy 74 qıylystyń árqaısyna 12 kameradan 888 baqylaý júıesi qoıylmaq. Al qarbalas kúni-túni úzilmeıtin 15 kósheniń boıyna 440 kamera ornatylýy múmkin.
«Buǵan deıin kamera ornatylmaǵan 120 aýlaǵa baqylaý júıesi ornatylady. Bilim berý, densaýlyq saqtaý, din, kóńil kóterý oryndary men saıabaqtar aýmaǵy tsıfrlandyrýdyń ıgiligin kóredi. Qala aýmaǵyna taldaý jasaı kele, jıi qylmys bolatyn, turaqty baqylaýdy qajet etetin 1700 oryn anyqtaldy. Solardyń barlyǵyna kamera qoıamyz» - deıdi Nurjan Jumadilov.
2020 jylǵa qaraı bir Óskemenniń ózinde 3928 kamera jan-jaqtan qaltqysyz baqylaý júrgizedi degen jospar bar. Sol kameralardan alynǵan derekterdiń bir danasy Qazaqstan kóshesine qoıylatyn sıtýatsııalyq ortalyqta saqtalady. Qaýipsizdik organdary ol derekter boıynsha tıisti shara qoldanyp otyrýy tıis.
«Ortalyqta kez kelgen derek 30 kúnge deıin saqtalady. Saqtaý merzimin uzartýǵa kúsh salyp jatyrmyz. Kez kelgen turǵyn kólik apatyna qatysty kúmáni bolsa, basqa da daýly máselelerge tap bolsa, polıtsııa departamenti arqyly ózine qajet beınederekti surata alady» - deıdi basqarma basshysy.
