Óskemende kólik qaǵyp ketken 10 jasar bala kóz jumdy
ÓSKEMEN. QazAqparat - Óskemende dárigerler kólik qaǵyp ketken balanyń ómirin saqtap qalý úshin birneshe kún kúresti. Ókinishke qaraı, balanyń alǵan jaraqattary tym aýyr bolyp shyqty, dep habarlaıdy QazAqparat YK-news.kz-ke silteme jasap.
Eske sala keteıik, 14 sáýir kúni Gagarın býlvarynda jeńil kólik joldan ótip bara jatqan 36 jastaǵy áıel men onyń 10 jasar balasyn qaǵyp ketken bolatyn. Olardyń densaýlyǵyna aýyr zııan kelgen. Jaraqat saldarynan búgin bala qaıtys boldy.
«Bala óte aýyr jaǵdaıda jetkizildi. Kóp jeri synǵan, basy jaraqattanǵan edi. Naýqas komadan kóz ashqan joq. Ana men bala ortalyǵynyń dárigerleri astanadaǵy Neırohırýrgııa ortalyǵyndaǵy áriptesterimen keńesip otyrdy. Dárigerler qolynan kelgenniń bárin jasady», - dep málimdedi Shyǵys Qazaqstan oblystyq densaýlyq saqtaý basqarmasynyń baspasóz qyzmeti.
