Óskemende kólik aıaldama pavılonyna soǵylyp, 1 adam zardap shekti
ÓSKEMEN. QazAqparat – Óskemen qalasynda kólik aıaldama pavılonyna soǵylyp, 1 adam zardap shekti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 15 tamyzda Karbyshev kóshesinde bolǵan.
«VAZ avtokóliginiń 18 jastaǵy júrgizýshisi rýldi basqara almaı qalyp, aıaldamaǵa soǵyldy. Pavılon áıel adamnyń ústine qulaǵan. Dene jaraqatyn alǵan jábirlenýshige medıtsınalyq kómek kórsetildi. Al kólik júrgizýshisi oqıǵa ornynan iz sýytqan», - dep habarlady vedomstvo ókilderi.
Qazirgi ýaqytta polıtsııa qyzmetkerleri júrgizýshini izdestirip jatyr. Ol jol-kólik oqıǵasyna kináli bolǵany jáne sol jerden ketip qalǵany úshin jaýapqa tartylmaq.
