Óskemende qolaısyz meteojaǵdaı týraly eskertý nege sıredi – Qazgıdromet túsindirdi
ÓSKEMEN. KAZINFORM – Óskemen turǵyndary qalada tútin men tuman jıi baıqalǵanymen, qolaısyz meteorologııalyq jaǵdaı (QMJ) týraly resmı eskertýlerdiń azaıǵanyna shaǵymdanyp otyr. «Qazgıdromet» mamandary muny aýa sapasyn baqylaýdyń avtomattandyrylǵan júıesine kóshýmen baılanystyrady.
Qala turǵyndarynyń aıtýynsha, keı kúnderi kóshede tynys alýdyń ózi qıyndaıdy. Alaıda sınoptıkter burynǵydaı qolaısyz meteojaǵdaı týraly eskertý jarııalamaıdy.
Bul másele ásirese mektep oqýshylary úshin ózekti. 2026 jylǵy aqpan aıynyń basynda Óskemende qolaısyz meteojaǵdaı kezinde mektepterdi qashyqtan oqytýǵa kóshirýdiń arnaıy tártibi bekitilgen bolatyn.
Erejege sáıkes, ekinshi dárejeli qolaısyz meteojaǵdaı úsh kún qatarynan saqtalsa, tórtinshi kúni sabaq onlaın formatqa aýystyrylady. Al úshinshi dárejeli qolaısyz meteojaǵdaı tirkelse, oqýshylar birden qashyqtan oqýǵa kóshedi.
Alaıda bul tártip qabyldanǵaly beri mektep oqýshylary tek bir ret – 2026 jylǵy 15 aqpanda onlaın oqýǵa jiberilgen. Odan keıin qolaısyz meteojaǵdaı týraly eskertýler kúrt azaıǵan.
«Qazgıdromet» mamandarynyń túsindirýinshe, mundaı eskertýler tek arnaıy esepteletin «R» kórsetkishi negizinde jarııalanady. Bul kórsetkish jeldiń jyldamdyǵyn, tumandy jáne zııandy shyǵaryndylardyń jer betine jaqyn qabatta jınalýyna yqpal etetin temperatýralyq ınversııany eskere otyryp, atmosferanyń ózin-ózi tazartý qabiletin baǵalaıdy.
– Buryn aýa synamalary qolmen jáne uzaq ýaqyt aralyǵynda alynatyn. Sonyń saldarynan jalpy statıstıkalyq kóriniste keıbir ózgerister baıqalmaı qalatyn. Qazir avtomattandyrylǵan baqylaý beketteri ár 20 mınýt saıyn úzdiksiz málimet beredi. Bul jeldiń ózgerisin, túngi temperatýralyq ınversııany jáne aýanyń qysqa merzimde qatty lastanýyn naqty tirkeýge múmkindik berdi. Buryn qolmen júrgizilgen ólsheýler mundaı ózgeristerdi tolyq qamtı almaıtyn, – dep túsindirdi mamandar.
Avtomatty stantsııalardan túsetin málimet kóleminiń ulǵaıýyna baılanysty esepteýdiń matematıkalyq negizi de ózgergen.
Bekitilgen ádistemege sáıkes, qolaısyz meteojaǵdaıdyń shekti kórsetkishi ár qala úshin kópjyldyq baqylaý nátıjeleri negizinde jeke esepteledi. Bul rette barlyq baqylaý kezeńindegi eń kúrdeli jaǵdaılardyń tek 2 paıyzy eskeriledi.
Avtomatty stantsııalardan úzdiksiz alynǵan derekterge súıengen esepteý Óskemen úshin «R» kórsetkishiniń shekti máni 0,90 ekenin kórsetti. Al buryn qolmen ólsheıtin beketterdiń derekteri boıynsha bul kórsetkish 0,46 bolǵan.
Osyǵan baılanysty «Qazgıdromet» 2026 jylǵy 26 aqpannan bastap kúndelikti aqparattyq bıýlletenderinde jańartylǵan kórsetkishterdi jarııalaı bastaǵan.
Mekeme ókilderi «R» kórsetkishiniń shekti máni eki esege jýyq óskeni qala aýasynyń eki ese lastanǵanyn nemese kerisinshe, eki ese tazarǵanyn bildirmeıtinin atap ótti. Bul tek qolmen jáne avtomatty túrde júrgiziletin ólsheýler jıiliginiń aıyrmashylyǵyna baılanysty.
Degenmen Óskemen turǵyndary mundaı túsindirýmen kelispeıdi. Olardyń aıtýynsha, jelsiz kúnderi qaladaǵy aýa sapasy jaqsarmaǵan. Al qolaısyz meteojaǵdaı týraly resmı eskertý jarııalanbaǵandyqtan, qalyń tútin kezinde balalardy úıde qaldyrý múmkindigi shektelip otyr.
«Qazgıdromet» mamandary qolaısyz meteorologııalyq jaǵdaı týraly aqparat berý tártibi Qazaqstan Ekologııalyq kodeksiniń 210-babyna sáıkes salalyq mınıstrliktiń buıryǵymen retteletinin málimdedi. Barlyq esepteý memlekettik ádisteme negizinde júrgiziledi.
Aıta keteıik, buǵan deıin «Qazgıdromet» 30 qyrkúıekte Óskemendi qosa alǵanda, elimizdiń alty qalasynda aýa sapasy nasharlaýy múmkin ekenin eskertken bolatyn.
