Óskemende qolaısyz meteorologııalyq jaǵdaıǵa baılanysty oqýshylar onlaın oqıdy
ÓSKEMEN. KAZINFORM – Óskemen qalasynda qolaısyz meteorologııalyq jaǵdaıǵa baılanysty 28 qarashada oqýshylar mektepke barmaıdy.
Qalalyq bilim bóliminiń málimetine súıensek, 28 qarashada 1-11 synyp oqýshylary onlaın formatqa aýystyrylady.
«Bundaı sheshimge ekinshi dárejeli qolaısyz meteorologııalyq jaǵdaıdyń qalyptasýy sebep bolyp otyr», - delingen aqparatta.
Ekinshi aýysymda oqıtyn balalar da qazir úılerine qaıtarylyp jatyr.
Aıta keteıik, Óskemende 23 qarashadan beri qolaısyz meteorologııalyq jaǵdaı qalyptasqan.
Eske salsaq, osyǵan deıin Óskemendegi Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy aýa sapasynyń nasharlap ketkenine shaǵymdanǵan.
Ekologtar tekserý júrgizgen soń hlorsýteginiń shekti ruqsat etilgen kontsentratsııasynan asyp ketýi tirkelgen.
Búgin taǵy da óskemendikterdiń aýa sapasyna shaǵymdanǵany habarlandy.