Óskemende qolaısyz meteorologııalyq jaǵdaıdyń birinshi dárejesi jarııalandy
ÓSKEMEN. KAZINFORM - Óskemende birneshe saǵattyń ishinde aýa raıyna qatysty boljam ózgerip, qolaısyz meteorologııalyq jaǵdaıdyń birinshi dárejesi jarııalandy.
Búgin tańerteń sınoptıkter oblys ortalyǵynda aýanyń lastaný deńgeıi tómen bolady dep boljap, arnaıy rejım engizýge negiz joq ekenin aıtqan. Alaıda kúndiz baqylaý beketterinde júrgizilgen ólsheý nátıjeleri qala atmosferasyna túsetin júktemeniń artqanyn kórsetti. Datchıkter bir mezgilde úsh zııandy zat boıynsha bir rettik shekti ruqsat etilgen kontsentratsııadan asý deregin tirkegen.
Atap aıtqanda, kómirtegi totyǵynyń mólsheri shekti ruqsat etilgen kontsentratsııadan 1,349 ese, kúkirtsýtek 1,113 ese, al kúkirt dıoksıdi 1,017 ese joǵary bolǵan.
Aýanyń lastanýyna avtokólikterden shyǵatyn tútin, jeke sektordaǵy peshpen jylytylatyn úıler jáne ónerkásiptik kásiporyndardyń shyǵaryndylary áser etken.
Sınoptıkterdiń boljamynsha, 19 qarashada lastaýshy zattardyń seıilýine qolaıly jaǵdaı qalyptaspaıdy. Túnde jáne tańerteń qala aýmaǵyn tuman basyp, shyǵystan jáne ońtústik-shyǵystan sekýndyna 2-7 metr jyldamdyqpen jel soǵady. Mundaı meteorologııalyq jaǵdaı jerge jaqyn aýa qabatynda zııandy zattardyń odan ári jınalýyna yqpal etedi.
– Qolaısyz meteorologııalyq jaǵdaılardyń kútilýine baılanysty 18 qarasha saǵat 20:00-den 19 qarasha saǵat 20:00-ge deıin Óskemen qalasynda QMJ-nyń birinshi dárejesi týraly eskertý jarııalanady, – dep habarlady «Qazgıdromet» RMK.
QMJ-nyń birinshi dárejesi engizilgen kezeńde qaladaǵy iri ónerkásiptik kásiporyndardyń jumys tártibi ózgeredi. Ekologııalyq zańnamaǵa sáıkes, zaýyttar arnaıy jumys kestesine kóship, eskertý kúshinde bolatyn ýaqytta atmosferaǵa taralatyn zııandy shyǵaryndylar kólemin qysqartýǵa mindetti.
Al qala turǵyndaryna, ásirese balalarǵa, qarttarǵa jáne tynys alý joldarynyń aýrýlarymen aýyratyn adamdarǵa osyndaı ýaqytta dalada uzaq júrmeý usynylady.
Eske salsaq, osyǵan deıin Óskemende ekologııalyq pasportty ázirleý bes jylǵa kesheýildegeni habarlanǵan.