Óskemende qolaısyz meteorologııalyq jaǵdaı kezinde qashyqtan oqýǵa kóshý tártibi bekitildi
ÓSKEMEN. KAZINFORM – Óskemen qalasynda qolaısyz meteorologııalyq jaǵdaı kezinde oqýshylardy qashyqtan oqytý formatyna kóshirýdiń naqty reglamenti aıqyndaldy.
Qolaısyz meteorologııalyq jaǵdaı men atmosferalyq aýanyń lastanýy kezinde mektepterdiń jumys tártibin aıqyndaıtyn jańa qujat bekitildi.
Qujatqa sáıkes, QMJ-nyń birinshi deńgeıi kezinde mektepter ádettegi rejımde jumysyn jalǵastyrady. Al ekinshi jáne úshinshi deńgeıde shekteý sharalary engiziledi.
Atap aıtqanda, eger QMJ-nyń ekinshi deńgeıi qatarynan úsh kún saqtalsa, tórtinshi kúni oqý protsesi qashyqtan oqytý formatyna aýystyrylady. Al úshinshi deńgeıdegi qolaısyz meteorologııalyq jaǵdaıda onlaın oqytý birinshi kúnnen bastap engiziledi.
Sonymen qatar sabaq kestesine de ózgerister qarastyrylǵan. Qashyqtan oqytý formatyndaǵy sabaqtardyń uzaqtyǵy balalarǵa túsetin júktemeni azaıtý maqsatynda 30 mınýtty quraıdy.
Óskemen qalalyq bilim bóliminen atalǵan reglament oqýshylardyń qaýipsizdigi úshin qabyldanǵanyn atap ótti.
- Qujat qolaısyz meteorologııalyq jaǵdaılar men aýanyń lastanýynyń bilim alýshylardyń densaýlyǵyna teris áser etýine jol bermeý, bilim berý protsesiniń turaqtylyǵyn qamtamasyz etý úshin ázirlendi, - delingen aqparatta.
Jańa reglament bilim bóliminiń 2026 jylǵy 2 aqpandaǵy buıryǵymen bekitildi. Onyń oryndalýyn baqylaý vedomstvo basshylyǵyna júktelgen.
Eske salsaq, osyǵan deıin Konstıtýtsııa jobasy qorshaǵan ortany qorǵaýdy ulttyq basymdyq retinde bekitetindigi habarlanǵan.