Óskemende qolaısyz meteorologııalyq jaǵdaı qalyptasqanyna jarty aı bolady

ÓSKEMEN. KAZINFORM - Óskemen qalasynda jel soqpaı, kóshelerdi tútin basyp turǵanyna erteń 15 kún bolady. 

«Qazgıdromet» RMK málimetine súıensek, qaladaǵy jelsiz kún erteń de jalǵasady. 

— Óskemen men Rıdder qalalarynda 2 naýryz saǵat 20.00-den bastap 3 naýryz saǵat 20.00-ge deıin ekinshi dárejeli qolaısyz meteorologııalyq jaǵdaı qalyptasady, - delingen aqparatta.

ıAǵnı, qala kóshelerin tútin tumshalap turǵanyna erteń tup-týra jarty aı bolady. 

Aıta keteıik, mamandar osyndaı kúnderde turǵyndarǵa tómendegi keńesterdi qaperde ustaý qajettigin eskertken bolatyn:

— Dalada uzaq júrmeý;

— Páterdegi terezeler men jeldetkishterdi jabý;

— Qaınatylǵan, tazartylǵan nemese gazsyz mıneraldy sý men sháı ishý;

— As sodasynyń eritindisimen tamaqty jıi shaıý;

— Tamaqtaný ratsıonyna quramynda pektıni bar azyq-túlikterdi, mysaly: pisirilgen qyzylsha, qyzylshanyń shyryny, alma, jemis kıseli, ıtmurynnan, raýaǵashtan jasalǵan dárýmendi sýsyndardy, shópterdiń qaınatpasyn, tabıǵı shyryndardy qosý;

— Balalardyń tamaqtaný ratsıonynda sút jáne sút ónimderin, irimshik, et tutynýdy kóbeıtý;

— Ýytty zattardy shyǵarý jáne aǵzany tazartý úshin tagan-sorbent, ındıgel, tagangel, belsendirilgen kómirdi qoldaný;

— Balalardy balabaqshalarda serýenge shyǵarmaýǵa, mektepterde dalada dene shynyqtyrý sabaqtaryn ótkizbeýge keńes beriledi.

Eske salsaq, buǵan deıin Óskemen qalasynda bıyl aýa sapasyn baqylaıtyn 25 beket ornatylatyny habarlanǵan.