Óskemende qolaısyz meteorologııalyq jaǵdaı qalyptasqanyna 5 kún bolady

ÓSKEMEN. KAZINFORM – Óskemen qalasynda 17 aqpannan beri jel soqpaı, qalany tútin basyp tur.

Óskemende 17 aqpannan beri qolaısyz meteorologııalyq jaǵdaı qalyptasyp keledi. «Qazgıdromet» RMK málimetine súıensek, jelsiz kún erteń de jalǵasady.

— Óskemen men Rıdder qalalarynda 20 aqpan saǵat 20.00-den bastap 21 aqpan saǵat 20.00-ge deıin ekinshi dárejeli qolaısyz meteorologııalyq jaǵdaı qalyptasady, — delingen aqparatta. 
Demek, qala aspanyn tútin tumshalap turǵanyna erteń besinshi kún bolmaq.

Aıta keteıik, mamandar osyndaı kúnderde turǵyndarǵa kelesi keńesterdi qaperde ustaý qajettigin eskertedi:

— Dalada uzaq júrmeý;

— Páterdegi terezeler men jeldetkishterdi jabý;

— Qaınatylǵan, tazartylǵan nemese gazsyz mıneraldy sý men sháı ishý;

— As sodasynyń eritindisimen tamaqty jıi shaıý;

— Tamaqtaný ratsıonyna quramynda pektıni bar azyq-túlikterdi, mysaly: pisirilgen qyzylsha, qyzylshanyń shyryny, alma, jemis kıseli, ıtmurynnan, raýaǵashtan jasalǵan dárýmendi sýsyndardy, shópterdiń qaınatpasyn, tabıǵı shyryndardy qosý;

— Balalardyń tamaqtaný ratsıonynda sút jáne sút ónimderin, irimshik, et tutynýdy kóbeıtý;

— Ýytty zattardy shyǵarý jáne aǵzany tazartý úshin tagan-sorbent, ındıgel, tagangel, belsendirilgen kómirdi qoldaný;

— Balalardy balabaqshalarda serýenge shyǵarmaýǵa, mektepterde dalada dene shynyqtyrý sabaqtaryn ótkizbeýge keńes beriledi.

Eske salsaq, buǵan deıin Óskemende aýa sapasynyń buzylyp turǵanyn jazǵan edik.