Óskemende qoqys jaǵatyn zaýyt salynbaıtyn boldy
ÓSKEMEN. QazAqparat – Óskemen qalasynda qoqys jaǵatyn zaýyt salynbaıtyn boldy, dep habarlaıdy QazAqparat tilshisi.
Qala ákimdigi qoqys jaǵatyn zaýyt salý josparynan bas tartty. Al qaldyqtardy basqarý júıesin jańǵyrtý jumystary jalǵasýda.
«Qoqysty suryptaý zaýytyn iske qosý qarastyrylǵan. Qurylys jumystary 80 paıyzǵa aıaqtaldy. Sondaı-aq qala syrtynda qatty turmystyq qaldyqtar saqtaıtyn jańa polıgondy jaılastyrý jobasy da iske asyrylady. Bul polıgon turǵyn aımaqtardan jyraqta bolyp qana qoımaı, burynǵyǵa qaraǵanda áldeqaıda ekologııalyq taza bolady», - deıdi shahar basshysy Jaqsylyq Omar.
Onyń aıtýynsha, qurylys aıaqtalǵannan keıin shamamen 2024 jyly Shmelev Log kenti mańyndaǵy eski qoqys orny jabylyp, aýmaq qalpyna keltiriledi.
