Óskemende qoqys tasıtyn kólik órtendi, júrgizýshi aýrýhanada
ÓSKEMEN. QazAqparat – Óskemen qalasynda qoqys tasıtyn kólik órtenip, denesin kúıik shalǵan júrgizýshi aýrýhanaǵa jetkizildi, dep habarlaıdy QazAqparat tilshisi.
Qalalyq Tótenshe jaǵdaılar basqarmasy baspasóz qyzmetiniń málimetine súıensek, demalys kúni KamAZ kóliginiń kabınasyn qyzyl jalyn sharpyǵan. Oqıǵa ornyna dereý jetken órt sóndirýshiler 4 sharshy metr aýmaqqa jaıylǵan tilsiz jaýdy sóndirdi.
«Órtti ózi óshirmek bolǵan 59 jastaǵy júrgizýshiniń aıaǵy men qolyn kúıik shalǵan. Apattar medıtsınasy ortalyǵynyń dárigerleri oǵan alǵashqy medıtsınalyq kómek kórsetti. Keıin jádel járdem qyzmetkerleri birden aýrýhanaǵa jetkizdi», - dep habarlady vedomstvo ókilderi.
Órttiń shyǵý sebebi qaýiptiligi joǵary agregatpen abaısyz jumys atqarýdan bolýy múmkin.
