Óskemende qoqys polıgonyndaǵy iri órt 24 saǵattan keıin sóndirildi
ÓSKEMEN. QazAqparat – Óskemen qalasynda qoqys polıgonyndaǵy iri órt sóndirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt 26 sáýirde saǵat 12:00 shamasynda bastalǵan. Qutqarýshylar arnaıy tehnıkalarmen sol jerde táýlik boıy jumys istedi. Tóbe bop úıilgen qoqys pen jel jańadan órt oshaqtaryn týdyryp, sóndirýdi qıyndatqan.
«Búgin saǵat 12.15-te qyzyl jalyn tolyqtaı sóndirildi. Órtengen aýmaqtyń aýdany 1 gektardy qamtyǵan», - dep habarlady vedomstvo ókilderi.
Aıta keteıik, oqıǵa ornyna barlyǵy 40 adam men 14 tehnıka jumyldyrylǵan. Aldyn ala málimet boıynsha jalynnyń shyǵýyna – qasaqana órt qoıý nemese otty abaısyz paıdalaný sebep bolýy múmkin.
Esterińizge sala ketsek, osyǵan deıin Óskemende qoqys polıgony órtenip jatqanyn habarlaǵan bolatynbyz.
