Óskemende kóktaıǵaq saldarynan júzdegen kólik qaladan shyǵa almaı qaldy

ÓSKEMEN. KAZINFORM – Shyǵys Qazaqstan oblysynda aýa raıynyń kúrt ózgerýi jol qozǵalysyn qıyndatty. 

Keshe tańerteń óńirde jańbyr jaýyp, artynan qarǵa ulasty. Aýa temperatýrasy tómendegen soń joldy kóktaıǵaq basty. Qaýipsizdik maqsatynda Óskemen qalasynan barlyq baǵytqa shyǵatyn joldar ýaqytsha jabyldy.

Respýblıkalyq mańyzy bar kólik joldaryn tazalaý jáne qum-tuz qospasymen óńdeý jumystaryna 100-den astam tehnıka men 120-dan astam maman jumyldyryldy. 

– Kóktaıǵaqqa baılanysty kólik qozǵalysyn ýaqytsha shekteýge týra keldi. Kúni boıy jol jamylǵysyn tazalaý jáne óńdeý jumystary úzdiksiz júrgizildi. Keshke qaraı barlyq baǵyt boıynsha qozǵalys qalpyna keltirildi, - deıdi «QAJservıs» JShS ShQO fılıalynyń bas ınjeneri Shyńǵys Zaıtov.

Keshke qozǵalys qaıta ashylǵan soń, jol qyzmeti men patrýldik polıtseıler kúrdeli ýchaskelerde avtokólikterdi alyp júrdi. 

Kólikter Almaty, Shemonaıha, Altaı, Rıdder jáne Semeı baǵyttaryna qaraı shyqty. Jalpy sany 500-den astam avtokóliktiń qaýipsiz ótýi qamtamasyz etildi. Onyń ishinde eń kóbi – 160 kólik Shemonaıha jáne Reseı shekarasy baǵytyna qaraı jol tartty. 

Eske salsaq, osyǵan deıin 20 aqpanda respýblıka boıynsha qaı joldarda qozǵalys shektelgeni jaıly jazǵanbyz.