Óskemende qoqys tolǵan páterdiń órtenýine qatysty qylmystyq is qozǵaldy
ÓSKEMEN. KAZINFORM — Óskemen qalasynda qoqys tolǵan páterdiń órtenýine qatysty polıtsııa qylmystyq is qozǵady.
Óskemen qalasynda polıtseıler turǵyn úıde bolǵan órt deregi boıynsha tergeý jumystaryn bastady.
Órt 5 aqpan kúni Áýezov dańǵyly boıyndaǵy № 49B mekenjaıyndaǵy kópqabatty úıde shyqqan. Páter ishi shamadan tys qoqyspen tolyp ketýine baılanysty órt sóndirýshiler tilsiz jaýmen 8 saǵattan astam ýaqyt boıy kúresti.
Shyǵys Qazaqstan oblysy polıtsııa departamentiniń habarlaýynsha, atalǵan derek boıynsha Ertis polıtsııa bóliminde QR Qylmystyq Kodeksiniń 204-baby 2-bóligine (Bótenniń múlkin abaısyzda joıý nemese búldirý) sáıkes sotqa deıingi tergeý bastaldy.
— Qazir qajetti tergeý amaldary júrgizilip, tıisti saraptamalar taǵaıyndaldy. Sonyń nátıjesinde órttiń naqty shyǵý sebebi jáne oqıǵanyń barlyq mán-jaıy anyqtalady. Tergeý qorytyndysy boıynsha qoldanystaǵy zańnama talaptaryna sáıkes protsessýaldyq sheshim qabyldanady, — delingen aqparatta.
Eske salsaq, osyǵan deıin Óskemende qoqys tolǵan páter otqa oranǵany jaıly jazǵanbyz.
