Óskemende qoqys shyǵarý tarıfi ózgerdi
ÓSKEMEN. KAZINFORM — Óskemende 1 qyrkúıekten bastap qatty turmystyq qaldyqtardy shyǵarý boıynsha jańa tarıfter qoldanysqa engizildi. Qyzmet aqysy shamamen 76 paıyzǵa ósti.
Kópqabatty abattandyrylǵan úılerdiń turǵyndary úshin aı saıynǵy tarıf endi bir adamǵa 757 teńge. Osyǵan deıin bul soma 431 teńge bolǵan. Al jeke sektor turǵyndary úshin tarıf 409 teńgeden 718 teńgege deıin kóterildi.
Osylaısha, abattandyrylǵan turǵyn úıde turatyndar úshin tólem bir adamǵa 326 teńgege, al jeke sektor halqyna 309 teńgege artty.
Aıta keteıik, Óskemende burynǵy tarıf 2022 jyldan beri qoldanysta bolǵan. Onyń qaıta qaralýyna qaldyqtardy jınaý jáne shyǵarý qyzmetin kórsetetin kásiporyndar shyǵyndarynyń ósýi sebep boldy.
— Osy ýaqyt ishinde jalaqyǵa, janar-jaǵarmaı materıaldaryna, qosalqy bólshekterge, arnaıy tehnıkany jóndeý jáne kútip ustaýǵa jumsalatyn shyǵyndar edáýir ósti. Qoldanystaǵy tarıf kásiporyndardyń naqty shyǵyndaryn ótemeıtin deńgeıge jetti, — delingen aqparatta.
Bul másele qalada birneshe aı boıy talqylandy. Mamyr aıynda Óskemen qalasynyń Qoǵamdyq keńesi jańa tarıfter jobasyn qoldasa, 16 maýsymda tıisti sheshimdi qalalyq máslıhat bekitti.
1 qyrkúıekten bastap jańa tarıfter kúshine enip otyr.
Eske salsaq, osyǵan deıin Astanadaǵy aqyly turaqtarda saralanǵan tarıf bolýy múmkin ekendigin jazǵanbyz.
