Óskemende qoǵamdyq oryndarda mas bolyp júrgen 113 adamǵa aıyppul salyndy
ÓSKEMEN. QazAqparat – Óskemen qalasynda qoǵamdyq oryndarda mas bolyp júrgen 113 adamǵa aıyppul salyndy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, 10-20 tamyz aralyǵynda tártip saqshylary «Esep» jedel aldyn alý sharasyn júrgizgen. Mundaǵy maqsat – esepte turǵan azamattardyń zań buzýyna jol bermeý, otbasylyq jáne turmystyq qatynastar salasyndaǵy qylmystyń aldyn alý. Sondaı-aq polıtseıler ishimdikke táýeldiligi bar adamdardy tekserdi.
«10 kún ishinde 317 quqyq buzýshylyq anyqtaldy. Onyń ishinde eń kóp tirkelgeni – alkogoldi ishimdik iship, qoǵamdyq oryndarda mas kúıde júrý. Osyndaı 113 fakti tirkelip, olar QR ÁQBtK-niń 440-babymen jaýapqa tartyldy», - delingen aqparatta.
Sondaı-aq qoǵamdyq oryndardy lastaǵan 59, tynyshtyqty buzǵan 51, Qazaqstan Respýblıkasynda tirkeýsiz nemese jeke basyn kýálandyratyn qujattarsyz turǵan 38 jáne otbasylyq-turmystyq qatynastar salasynda zańsyz áreketke jol bergen 24 adam anyqtaldy.
