Óskemende qoǵamdyq orynda maska taqpaı júrgenderge aıyppul salynyp jatyr

ÓSKEMEN. QazAqparat – Shyǵys Qazaqstan oblysynda karantın shekteýlerin saqtamaıtyndar áli de anyqtalýda, dep habarlaıdy QazAqparat tilshisi.

Óńirde arnaıy qurylǵan monıtorıngtik toptar karantın talaptarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

«24 mamyr kúni Óskemen qalasynda 161 obekti tekserildi. Oblystyń Bas sanıtarlyq dárigeri belgilegen shekteý sharalaryn buzýdyń 5 faktisi tirkeldi. Naqty aıtqanda, saýda oryndarynda, qoǵamdyq tamaqtaný obektilerine maska rejımin saqtamaǵandar anyqtaldy. Sondaı-aq buryn tirkelgen buzýshylyqtar boıynsha 43 755 teńge mólsherinde aıyppul salyndy» delingen ShQO aqparat ortalyǵy taratqan málimette.

Rıdderde ótken táýlikte 73 obekti tekserilgen. Reıd barysynda buzýshylyqtar tirkelgen joq.

Biraq osyǵan deıingi tekserý barysynda jumys ornynda maskasyz otyrǵan azamatqa 43755 teńge kóleminde aıyppul salynǵan.

Besqaraǵaı aýdanynda monıtorıngtik toptar 20 obektige tekserý júrgizdi.

Nátıjesinde shekteý sharalaryn buzýdyń 1 faktisi anyqtalǵan.