Óskemende qoǵamdyq kólikter elektrondy tólem júıesine kóshedi

Oblys ortalyǵynda qoǵamdyq kólik qatynasyn úılestiretin ortalyq quryldy. Bul mekeme avtobýs tasymaldaýshylary arasynda konkýrs jarııalap, olardyń jumys sapasyn qadaǵalaıtyn bolady. Qala ishindegi avtobýstarǵa elektrondy tólem júıesin engizý de osy mekemeniń mindeti bolmaq.

«Bizdiń júıeniń Almatydaǵy «Ońaı» tólem kartasynan ózgeshelikteri bar. Alǵashqy 1,5 jyl kóleminde qazir kondýktor bolyp júrgen adamdar «keńes berýshi» retinde jumys isteıtin bolady. Olar avtobýs jolaýshylaryna tólem kartasyn qalaı suǵyp, aqsha aýdarý kerektigin úıretedi. Sondyqtan, jańa júıe engizilse, 400 adam jumyssyz qalady degen jalǵan aqparat. Tipti jumyssyz qalǵandaryn basqa qyzmetterge ornalastyratyn bolamyz», - deıdi Óskemen qalasynyń jolaýshy tasymalyn basqarý ortalyǵy dırektorynyń orynbasary Ernar Mustafın.

Atalmysh júıe bıylǵy jyldyń sońyn ala nemese keler jyldyń basynda qoldanysqa enedi. Barlyq avtobýsqa ornatylatyn termınal bir ortalyqtan basqarylmaq. Osynyń arqasynda árbir kóliktiń kúnine neshe aınalym jasaǵany, qansha adam otyryp, tólem jasaǵany aıqyn bolady. Tólem jasalǵannan keıin 3 sekýndtyń ishinde banktegi shotqa aqsha túsip otyrady.

«Bul jobaǵa 1 mlrd teńgeden astam qarjy kerek. Óıtkeni barlyq avtobýstardy termınalmen jáne baqylaý kameralarymen jabdyqtaý qajet. Sondaı-aq ár avtobýsqa «dıspetcherlik jetek» baǵdarlamasy engiziledi. Ol belarýstyq tehnologııaǵa negizdelgen. Bul óz kezeginde turǵyndardyń shaǵymyna der kezinde áreket etýge múmkindik beredi. Osy jetektiń kómegimen qaı avtobýstyń qaı jerde ketip bara jatqanyn kórip otyramyz. Kóp degende 4-5 metrge ǵana qatelik ketýi múmkin. Bul bir jaǵynan tasymaldaýshylardyń salyqty tabysyna saı tóleýine jol ashady», - deıdi Ernar Mustafın.

Jobany qoldaýshylar elektrondy tólem júıesi jol júrý aqysyna áser etpeıtinin aıtyp otyr. Óıtkeni, oǵan bıýdjetten qarjy qarastyrylǵan.