Óskemende qoǵamdyq kóliktegi jolaqyny 90 teńgege kóterý usynyldy
ASTANA. QazAqparat - Búgin Shyǵys Qazaqstan oblys ortalyǵynyń Qoǵamdyq keńesinde kezekten tys otyrys ótkizildi, onda qaladaǵy jolaýshy tasymaldaýshylar taǵy da bir márte qoǵamdyq kóliktegi jolaqyny kóterýdi usyndy.
Olar jolaqyny 75 teńgeden 90 teńgege jetkizýdi kózdep otyr, dep habarlaıdy Altaynews.kz.
Jolaýshy tasymaldaýshylar jergilikti bılikten tarıfti kóterýdi byltyrdan beri surap keledi. Maýsym aıynda olar qalalyq TKSh bólimine jolaqy tarıfin esepteý ádistemesin usyndy. Arnaıy komıssııa quryldy.
- Alǵashqy joly bizdiń ortasha qalalyq tarıf 157 teńge boldy, alaıda jyljymaly quramdy qaıta baǵalaǵanda bul soma 176,5 teńgege jetti, - deıdi «ShQO avtotasymaldaýshylar odaǵy» qaýymdastyǵynyń tóraǵasy Nıkolaı Masıch. - Biz qyrkúıekte tarıfti belgilengen jeńildikterdi saqtaı otyryp 100 teńge kóleminde qaldyrýdy usyndyq.
Qazirgi ýaqytta jolaqy belgilengen jeńildikterdi saqtaı otyryp Astanadaǵydaı 90 teńge kóleminde usynyldy.
- Qazirgi ýaqytta qosalqy bólshekter, avtobýstar men oǵan jaratylatyn materıaldar eki esege qymbattady, - deıdi Nıkolaı Masıch. - Sonymen qatar kadr jetispeýshiligi baıqalýda, 40-tan astam júrgizýshi men kondýktor zeınetkerlik jasyna jetip qaldy.
Eger tarıf qymbattasa tasymaldaýshylar jeńildikterdi qalpynda qaldyrmaq. Sonymen qatar bastapqy birneshe aıda aılyq jolaqy bıleti ózgermeıdi - 7000 teńge kóleminde bolady. Zeınetkerler 60 teńge tóleıdi. Stýdentter 50 paıyz jeńildikpen júredi (45 teńge) dep kózdelýde. Óıtkeni qalalyq ákimdik jastar uıymdarynyń suraýy boıynsha olardyń tarıfin sýbsıdııalaýǵa ázir. Osy maqsatta bıýdjetten 48 mln teńge bólingen.
Alaıda 16 men 18 jas aralyǵyndaǵy jasóspirimder bıletti 90 teńgeden satyp alýǵa májbúr, óıtkeni osy jas sanatyndaǵy jolaýshylarǵa jeńildik qarastyrylmaǵan.
