Óskemende klıenttiń kóligin urlaǵan slesar ustaldy
ÓSKEMEN. QazAqparat – Óskemen qalasynda bótenniń kóligin aıdap ketken 30 jastaǵy er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, patrýldik polıtseıler qyrkúıek aıynyń basynda urlanǵan VAZ-2114 avtokóligine uqsas kólikti toqtatty. Tekserý kezinde júrgizýshi kólik quralyn basqarýǵa ruqsat beretin qujattardy kórsete almaǵan. Tártip saqshylary qosymsha tergeý úshin ony polıtsııa bólimine jetkizdi.
«Anyqtalǵandaı, er adam ózi slesar bolyp jumys isteıtin tehnıkalyq qyzmet kórsetý stantsııasyndaǵy klıenttiń kóligin urlap ketken. Atalǵan kólik Glýbokoe aýdanyndaǵy kásiporynnyń balansynda bolyp shyqty», - dedi ShQO PD bastyǵy Saǵat Mádıev.
Qazirgi ýaqytta QR Qylmystyq kodeksiniń 200-baby 1-bóligi boıynsha sotqa deıingi tergeý amaldary júrgizilýde.
