Óskemende qyzylsha juqtyrǵandar sany artyp keledi
Óskemen qalasynda búginde qyzylsha juqtyrǵan 92 adam tirkelip otyr, dep habarlaıdy Kazinform.
Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq Sanıtarlyq-epıdemıologııalyq baqylaý basqarmasy basshysynyń orynbasary Arman Saǵyndyqov málim etti.
«Óskemende qyzylsha juqtyrǵan 92 adam tirkeldi. Negizinen, aýrý vaktsına almaǵandar arasynda tirkelip otyr. Biz naýqastarmen baılanysta bolǵan adamdar tobyn jáne olardyń vaktsına saldyrǵan-saldyrmaǵanyn anyqtaı otyryp, qyzylshanyń árbir jaǵdaıyna epıdemıologııalyq tekserý júrgizýdemiz. Medıtsınalyq uıymdarǵa epıdemııaǵa qarsy jáne profılaktıkalyq is-sharalardy uıymdastyrý jóninde qyzmettik hattar jiberildi. Bul syrqatqa shaldyqqandar apta saıyn kóbeıip keledi», - dedi ol.
Sonymen qatar qazirgi tańda qyzylsha, qyzamyq jáne parotıtke qarsy qosymsha jappaı ımmýndaý bastaldy.
«Basqarma mamandary densaýlyq saqtaý uıymdarynda, orta jáne joǵary bilim berý mekemelerinde, balabaqshalarda qyzylshanyń aldyn alý boıynsha túsindirý jumystaryn júrgizip jatyr. Azamattarǵa arnaıy paraqshalar, býkletter men jadynamalar taratylýda», - dedi Arman Saǵyndyqov.
