Óskemende qyrkúıekten bastap tramvaı jolaqysy ózgere me
ÓSKEMEN. KAZINFORM — Óskemen qalasynda tramvaı jolaqysy ózgerissiz qalady.
Qaladaǵy avtobýs jolaqysy 1 qyrkúıekten bastap ózgerýi múmkin. Tarıfti qaıta qaraý jónindegi jobany Shyǵys Qazaqstan oblysynyń Qoǵamdyq keńesi qoldaǵan bolatyn. Joba maquldanǵan jaǵdaıda qolma-qol aqshasyz tólem kezinde jolaqy qazirgi 90 teńgeniń ornyna — 120 teńge, al qolma-qol esep aıyrysqanda 130 teńgeniń ornyna — 200 teńge bolady.
Osy rette, turǵyndar arasynda «Tramvaı jolaqysy da qymbattaı ma?» degen saýal týyndady. Buǵan «Óskemen qalasynyń kólik kompanııasy» JShS-dan jaýap berdi.
Kompanııa basshysy Denıs Fedchenkonyń aıtýynsha, ázirshe tramvaıdaǵy jolaqy tarıfin kóterý máselesi kún tártibinde joq.
— Tarıftiń bir kúni ózgeretini túsinikti. Óıtkeni jolaqy quny 90 jáne 130 teńge bolyp máńgi qalmaıdy. Alaıda qazirgi ýaqytta tramvaıdaǵy jolaqy tarıfin kóterý máselesi qarastyrylyp jatqan joq, — dedi ol.
Eske salsaq, osyǵan deıin Óskemende avtobýs jolaqysyn kóterý bastamasy qoldaý tapqanyn habarlaǵanbyz.
