Óskemende qıraǵan Shnaıder kópiri demontajdalyp jatyr

ÓSKEMEN. KAZINFORM – Óskemen qalasynda qıraǵan Shnaıder kópiriniń ornyna jańasyn salý úshin burynǵy tirekterdi demontajdaý jumystary júrgizilip jatyr.

Qazirgi ýaqytta kópir aýmaǵynda arnaıy tehnıka jumyldyrylyp, mamandar tireýishter men aralyq qurylymdardy kezeń-kezeńimen bólshekteı bastady. Jumystar kópirdi tolyq rekonstrýktsııalaýǵa daıyndyq aıasynda júrgizilip jatyr.

Eske salsaq, Shnaıder kópiriniń bir bóligi 2025 jyldyń 1 qyrkúıeginde opyrylyp túsken. Abyroı bolǵanda, sol sátte ótkelde eshkim bolmaǵandyqtan, zardap shekkender bolǵan joq.

Bastapqyda óńir bıligi qulaǵan bólikti qalpyna keltirip, eki aı ishinde jóndeýdi josparlaǵan edi. Alaıda keıin bul sheshimnen bas tartyldy. Mamandar qoldanystaǵy qurylymdy qaıta jańǵyrtý tıimsiz degen qorytyndyǵa kelgen.

Qazirgi ýaqytta eski kópirdi tolyq buzyp, onyń ornyna jańasyn salýdy qarastyratyn rekonstrýktsııa jobasynyń smetalyq qujattamasy ázirlenip jatyr.

– Jobalaý jumystaryn kelisimshart aıasynda «Qazaq PromTransProekt» JShS júzege asyrady. Ol jumystar aıaqtalǵannan keıin aldaǵy qurylys kólemi men ony júzege asyrý merzimderi naqtylanady, – dep habarlady Óskemen qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminen.

Eske salsaq, osyǵan deıin ShQO-da Shnaıder kópirindegi apattan keıin basqarma basshysy qyzmetinen ketkenin jazdyq.