Óskemende Qydyr ata úıi ashyldy
ÓSKEMEN. KAZINFORM – Óskemen qalasynyń turǵyndary men qonaqtary úshin naǵyz mereke uıymdastyryldy. Oblystyq mýzeı-qoryqtyń Sol jaǵalaý kesheninde qala turǵyndary Naýryz merekesin toılady.
Merekelik kontsert Shyǵys Qazaqstannyń solısteri men shyǵarmashylyq ujymdarynyń qatysýymen ótti. Sondaı-aq, Qazaqstan Respýblıkasynyń eńbek sińirgen qaıratkeri Nurlan Abdýllın qonaq bolǵan.
Barlyq kelýshiler mýzeı-qoryqta saqtalǵan biregeı jádigerlermen tanysa aldy. Al kórme-jármeńkede sándik-qoldanbaly óner sheberleri óz ónimderin usyndy.
Eresekter men balalar sadaq atý, arqan tartys sekildi sporttyq jarystarǵa qatysty jáne «Asyq» oıynyn oınady.
ShQO ákimi Ermek Kósherbaev qala turǵyndaryn kóktemniń basty merekesimen quttyqtady. Óńir basshysy Naýryz meıramynyń ár kúni erekshe ekenin atap ótti.
Merekeniń basty oqıǵasy – Qydyr ata rezıdentsııasynyń ashylýy boldy. Rezıdentsııa ulttyq stılde jabdyqtalǵan, bul qazaq halqynyń mádenıeti men dástúrleriniń baı álemimen tanysýǵa múmkindik beredi.
«Qydyr ata – 22 naýryzǵa qaraǵan túni ár úıge baqyt pen molshylyq ákeletin mıftik keıipker, - dedi ShQO mádenıet basqarmasynyń basshysy Nurbolat Ahmetjanov. - Barlyq adamdar ony asyǵa kútedi, merekelik dastarhan jasaıdy. Oblys turǵyndaryn Naýryz merekesimen quttyqtaımyn».
Barlyq tilek bildirýshiler Qydyr ataǵa hat jazdy. Erekshe qajettilikteri bar jas qonaqtarǵa sertıfıkattar men tátti syılyqtar tabys etildi. Árıne, eń mańyzdy syılyq kóktemgi kóńil-kúı boldy.
«Naýryz – jańarýdyń, beıbitshilik pen jaqsylyqtyń merekesi. Búgin keremet kóńil-kúı ornady, bárimiz kóktemniń bastalýyna shyn qýanyshtymyz. Barshańyzǵa densaýlyq, baqyt tileımin, mol dastarhan tek qana jaqsylyqqa jaıyla bersin!», - dep bólisti Óskemen qalasynyń turǵyny Svetlana Shmýrygına.
