Óskemende keýdesin qyzǵanysh kernegen jigit tanysyn pyshaqtap tastady
ÓSKEMEN. QazAqparat – Óskemen qalasynda qyzǵanyshtan tanysyna pyshaq suqqan 17 jastaǵy jigit ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, qyrkúıek aıynyń aıaǵynda «102» arnasyna qońyraý shalǵan zeınetker Prıstan aýdanyndaǵy kópqabatty úıdiń aýlasynda pyshaqtalǵan adam týraly habarlady.
«Oqıǵa ornyna dereý jetken tártip saqshylary tóbelestiń Tolstoı kóshesinde bolǵanyn anyqtady. Tanysynyń úıine qonaqqa barǵan jigit aşy sýdan urttaǵan. Birazdan soń masaıa bastaǵan er adam úı ıesinen bir qyzdy qyzǵanyp, qolyna pyshaq alyp jábirlenýshiniń ish tusyna suǵyp jibergen. Jedel-izdestirý sharalary barysynda Glýbokoe aýylynyń 17 jastaǵy turǵyny ustaldy. Páterden shyǵyp ketken ol sol jerden qashyp ketpek bolǵan», - dep habarlady vedomstvo ókilderi.
Qazirgi ýaqytta polıtsııa qyzmetkerleri Qazaqstan Respýblıkasy Qylmystyq kodeksiniń 106-baby boıynsha sotqa deıingi tergeý amaldaryn júrgizýde. Kúdikti óz kinásin moıyndap otyr.
