Óskemende kene shaqqan bala aýrýhanaǵa tústi
NUR-SULTAN. QazAqparat - Óskemende mektep oqýshysyn kene shaǵyp, bala aýrýhanaǵa tústi, dep habarlaıdy QazAqparat tilshisi.
Kene shaqqan balanyń aýrýhanaǵa túskeni týraly respýblıkalyq BAQ kózderi aqparat taratqan bolatyn. Shyǵys Qazaqstan oblystyq densaýlyq saqtaý basqarmasynyń baspasóz qyzmeti balanyń jaǵdaıy jaqsarǵanyn habarlady.
«Qazirgi tańda balanyń jaǵdaıy birqalypty. Búgin aýrýhanadan shyǵaramyz. Kene shamamen sáýir aıynyń sońynda shaqqan. Eki aptadan keıin balanyń temperatýrasy kóterilip, basy aýyrǵan. Osydan keıin jedel járdem shaqyrylyp, bala statsıonarlyq emdeýde 12 kún jatqan», - dep habarlady vedomstvonyń baspasóz qyzmetinen.
Basqarma spetsıfıkalyq terapııa júrgizilgenin jáne balanyń júıke júıesi eshqandaı aqaýsyz saýyǵyp kele jatqanyn habardar etti.
