Óskemende kelesi aptadan bastap 50 oryndyq gospıtal iske qosylady
ÓSKEMEN. QazAqparat – Shyǵys Qazaqstan oblysynda vırýs juqtyrǵandar sany kúnnen kúnge artýda. Osy oraıda óńirdiń túkpir-túkpirinde naýqastardy qabyldaıtyn jańa statsıonarlar ashylyp jatyr. Kelesi aptada Óskemen qalasynda 50 oryndyq gospıtal jumysyn bastamaq. Bul jaıly QazAqparat tilshisine ShQO bas pýlmonolog dárigeri Zaǵrıpa Ábdıeva aıtyp berdi.
«Qazir ókinishke qaraı, óńirimizde koronavırýs juqtyrǵandar sany artyp keledi. Óskemen qalasyndaǵy Abaı jáne Shákárim dańǵyldaryndaǵy statsıonarlar 80-90%-ǵa tolǵan. Sondyqtan dúısenbiden bastap oblystyq aýrýhanada COVID-19 ınfektsııasyna shaldyqqandardy emdeıtin jańa gospıtal ashylady. Barlyq qajetti jabdyqtarmen qamtamasyz etilgen sol medıtsınalyq mekemede 50 naýqasty qabyldaı alamyz», - deıdi Zaǵrıpa Ábdıeva.
Onyń aıtýynsha, eshqandaı sımptom baıqalmaǵan nemese jeńil formada aýyrǵan patsıentter úı karantınine oqshaýlanýda. Al ortasha jáne aýyr deńgeıdegi naýqastar statsıonarlarǵa jatqyzylýda.
«Aımaq halqyn sabyr saqtap, dúrbeleńge salynbaýǵa shaqyramyn. Eger sizde juqpaly derttiń qandaı da bir belgileri baıqalsa óz betińizben emdelý joldaryn izdemeı, mekenjaıyńyz boıynsha otbasylyq ambýlatorııaǵa habarlasyńyz. Ár ambýlatorııada arnaıy mamandar ázirlengen. Olar úıińizge kelip, sizden COVID-19-ǵa synama alyp, udaıy baqylaý júrgizedi. Eger vırýs anyqtalyp jatsa, tıisti sharalar qabyldanady», - deıdi ol.
Óńirdiń bas pýlmonolog dárigeri turǵyndarǵa karantın shekteýlerin qatań saqtaý qajettigin eskertti.
«Dalaǵa shyqqanda mindetti túrle maska taǵyp, áleýmettik qashyqtyqty saqtańyzdar. Eger siz nan alý úshin bir dúkenge kirgende kezekte maska kımegen bireý tursa, shyǵyp ketińiz. Eń bastysy densaýlyq qoı, al nandy basqa jerden de alýǵa bolady. As berip, toı-tomalaq ótkizýden bas tartyńyzdar!», - deıdi Zaǵrıpa Ábdıeva.
