Óskemende qazan aıynda pýlmonologııa ortalyǵy ashylmaq
ÓSKEMEN. QazAqparat – Óskemen qalasyndaǵy Pýlmonologııa ortalyǵynyń qurylysy aıaqtalýǵa jaqyn, dep habarlaıdy QazAqparat tilshisi.
Bul jaıly Shyǵys Qazaqstan oblysynyń ákimi Danıal Ahmetov óziniń Instagram jelisindegi jeke paraqshasynda jazdy.
«Pýlmonologııa ortalyǵynyń qurylysy máresine jetýge shaq qaldy. Qurylysshylardyń joǵary jaýapkershiligi qýantady. Barlyǵy qazan aıynyń sońyna deıin nysan iske qosylýy tıis ekenin jaqsy túsinedi. Onyń ústine ortalyqty jabdyqtaý úshin biz eń zamanaýı jáne qajetti jabdyqtardy satyp aldyq», - deıdi aımaq basshysy.
Onyń aıtýynsha, oblysta koronavırýstyń yqtımal jańa tolqynyna 5 300 ınfektsııalyq jáne provızorlyq tósek oryn, 5 PTR zerthana daıyndalǵan. Zerthananyń árqaısysy kúnine myń synama jasaýǵa qaýqarly. Qosymsha 3 kompıýterlik tomograf satyp alyndy.
Pandemııadan keıin pýlmonologııa ortalyǵy tek emdeý emes, sonymen qatar tynys alý aýrýlary bar naýqastar úshin eń ozyq medıtsınalyq tehnologııalar qoldanylatyn ǵylymı mekemege aınalmaq.
