Óskemende qazaqtan shyqqan tuńǵysh áskerı ushqysh Jaqypbek Maldybaevqa stella ornatyldy
Jaqypbek Maldybaev 1907 jyly 15 mamyrda Shyǵys Qazaqstan oblysy Kúrshim aýdanynyń Sheńgeldi aýylynda týǵan. 1929 jyly óz erkimen Qyzyl Armııa qataryna qosylyp, Merv qalasyndaǵy Túrkistan atty ásker brıgadasynyń 82-derbes polkynda qyzmet etti. 1937 jyly Jýkovskıı atyndaǵy Áskerı Áýe Akademııasynyń shtýrmandyq bólimin syrttaı oqyp bitirgen Jaqypbek zvenonyń flagshtýrmany qyzmetine taǵaıyndalady.
Sovettik 160 erikti ushqyshtar qatarynda aǵa leıtenant Jaqypbek Maldybaev Ispanııanyń azattyq soǵysyna qatysady. Sodan elge qaıtyp kele jatqanda, Tashkent mańynda 1938 jylǵy 30 naýryzda avıatsııalyq apattan opat bolǵan. Qazaqtan shyqqan tuńǵysh áskerı ushqysh Tashkent qalasyndaǵy áskerı aerodromnyń birindegi ushqyshtar zıratyna jerlengen.
9 qarasha kúni Óskemendegi Jaqypbek Maldybaev kóshesinde áskerı ushqyshqa stella ornatyldy. Saltanatty ashylý rásimine qala ákiminiń orynbasary Irına Smıt, ushqyshtyń nemere inisi Bolatbek Maldybev, nemere qaryndasy Kúlásh Omarqyzy qatysty. Shara barysynda tuńǵysh ushqyshtyń ómirin zerttep, arhıvterden aqtaryp, qundy tarıhı maqala jazǵan jýrnalıst-jazýshy Aıtmuhambet Qasymov sóz aldy.
«Bul stella byltyr boı kótergen «Máńgilik el» monýmenti, jýyqta ornatylǵan Halyq qaharmany Saǵadat Nurmaǵambetovtyń eskertkishi sııaqty Óskemenniń kórki men kelbetine qosylyp otyrǵan sáýlet óneriniń tamasha bir týyndysy ǵana emes, keıingi urpaqtyń babalar men aǵalar erligine degen qurmeti men paryzy, ulttyq rýhymyzdy kóterip, jalyndata túsetin kıeli de qasıetti eskertkish dep aıtýǵa ábden bolady. Osy úlken iske muryndyq bolǵan qala ákimdigine, eskertkishtiń avtory Nurbol Qalıevqa shyn júrekten alǵysymdy bildiremin!», - dedi ol.
