Óskemende qaıyǵy aýdarylyp qalǵan eki adam qutqaryldy
ShQO Tótenshe jaǵdaılar departamenti baspasóz qyzmetiniń málimetinshe, «Zvezda» kemesiniń kapıtany Aleksandr Baharev pen rýldik-motorıst Andreı Denısenko jolaýshylarmen birge Ertis ózeniniń boıyndaǵy «Samal saıabaǵy-Ózen vokzaly» turaqty baǵyty boıynsha kele jatqan.
Kenet sýda qaıyǵy aýdarylyp qalǵan áıel men er adamdy baıqaı salysymen, birden kómekke umtyldy.
«Olar kemeden qutqarý sheńberin laqtyryp, adamdardy sýyq sýdan shyǵaryp aldy. Belgili bolǵandaı, ekeýi sýda qaıyqpen júzip júrgen. Bir ýaqytta erkek qaıyqqa ıe bola almaı qalǵan soń qaıyq aýdarylyp tústi. Abyroı bolǵanda, ekeýi de qutqarý keýdeshelerin kıgen eken», - delingen aqparatta.
Osy rette, TJD qyzmetkerleri halyqqa sýdaǵy qaýipsizdik sharalaryn qatań saqtaý qajettigin eskertedi. Qaıyqqa otyrǵan kezde qutqarý keýdeshesin kııýdi umytpańyz. Júzý quralyn shamadan tys júktemeńiz. Qolaısyz aýa raıynda, qatty jelde qaıyqpen sýǵa shyqpańyz.
