Óskemende qaıtadan elektrobýstar qatynaı bastaıdy

ÓSKEMEN. KAZINFORM – Óskemen qalasynda aldaǵy aptalarda elektrobýstar satyp alý josparlanǵan.

Jergilikti bılik bul qadamdy qalanyń ekologııalyq jaǵdaıyn jaqsartý jolyndaǵy mańyzdy bastamalardyń biri dep sanaıdy. Alaıda bul jańalyq turǵyndar arasynda birneshe suraq týyndatty. Sebebi jeti jyl buryn osyndaı tájirıbe qolǵa alynǵanymen, ol kútken nátıjeni bermegen edi.

Avtoparkti jańartý jospary oblystyq máslıhat sessııasynda aıtyldy. Elektrobýstar dızel otynymen júretin dástúrli avtobýstarǵa balama kólik túri retinde qarastyrylyp otyr. Qala ákimdiginiń málimetinshe, bul jolǵy satyp alý birrettik shara emes, elektrobýstardyń Óskemenniń naqty jaǵdaılaryna, ásirese qystyń qatal klımatyna qanshalyqty beıimdelgenin synaqtan ótkizýge baǵyttalǵan.

- Biz úshin elektrobýstardyń aıazdy kúnderi jáne tolyq júktememen qalaı jumys isteıtinin kórý óte mańyzdy. Olar sońǵy aıaldamalarda qýattalyp, qozǵalys kestesin buzbaıtyndaı etip, naqty jumys rejıminde synaqtan ótedi, - dedi Óskemen qalasynyń ákimi Almat Aqyshov.

Oblys ortalyǵynyń mundaı tájirıbeden ótkenin jurt jaqsy biledi. 2018 jyly elektrobýs synaq retinde № 44 marshrýtqa shyǵarylǵan bolatyn. Alaıda sol kezde onyń qýaty marshrýt boıynsha barlyq aıaldamalardy eńserýge jetkiliksiz ekeni anyqtalyp, joba toqtatylǵan. Osylaısha «jasyl» kólik taqyryby biraz ýaqytqa kún tártibinen túsken-di.

Qazirgi tańda bılik ókilderi sońǵy jyldary tehnologııalardyń aıtarlyqtaı damyǵanyn, al bul jolǵy engizý tásiliniń múlde ózgeshe bolatynyn aıtyp otyr. Elektrobýstardy qoldanystaǵy marshrýttyq jelige qýattaý ınfraqurylymyn jáne klımattyq erekshelikterdi eskere otyryp engizý josparlanǵan.

Jańa bastamanyń nátıjesi aldaǵy aılarda-aq belgili bolmaq.

Eske salsaq, osyǵan deıin Rıdder avtobýstarynda elektrondy bıletteý júıesi engiziletindigi habarlanǵan.