Óskemende qaıda qurbandyq shalýǵa bolady
Qurban aıt merekesi aıt namazynyń oqylýymen bastalady. Shyǵys Qazaqstan oblysy boıynsha oblystyq, qalalyq, aýdandyq jáne aýyldyq meshitterde aıt namazy 28 maýsym kúni tańǵy saǵat 7.00-de oqylady.
Al saǵat 07.30-dan bastap ShQO «Halıfa Altaı» meshitiniń aldynda merekelik rýhanı-mádenı sharalar, sporttyq básekeler uıymdastyrylady.
Óskemen qalalyq ákimdiginiń kelisimimen Shyǵys aýylynda qurban shalý orny ashyldy. Qurbandyqty erteń saǵat 07.30-dan bastap shalýǵa bolady. Mal soıatyn qasapshylar «Halıfa Altaı» meshitindegi oqytý ortalyǵynda arnaıy kýrstan ótken.
«Qurbandyqtyń etteri turmysy tómen otbasylarǵa, áleýmettik ortalyqtarǵa 28, 29, 30 maýsym kúnderi «Halıfa Altaı» meshitinde úılestiriledi. Bul jumystar úshin de meshittiń oqytý ortalyǵynda qurban aıtta qyzmet kórsetetin eriktiler arnaıy oqytyldy. Sonymen qatar mal satatyn azamattarmen baǵany retteý boıynsha túsindirý jumystary júrgizildi», - deıdi QMDB Shyǵys Qazaqstan oblysy boıynsha bas ımamy Ermek qajy Qasbolatuly.
Onyń aıtýynsha, qurbandyqqa qoı, eshki, sıyr jáne túıe malyn shalýǵa bolady. Qurban retinde shalynatyn qoı jáne eshki kem degende bir jasar, sıyr eki jasar, túıe bes jasar bolýy kerek. Qoı men eshkiniń erkegin, sıyrdyń urǵashysyn shalý abzal.
«Qoı nemese eshkini tek bir adam qurban retinde shala alady. Al sıyr nemese túıeni ıaǵnı, iri qarany bir kisiniń jalǵyz ózi úshin shalýyna bolatyn sııaqty jeti kisige arnap, ortaq shalýlaryna bolady. Qurbandy ortaqtasyp shalǵan ýaqytta árbir adam qurban shalý nıetimen ortaqtasýy kerek. Bir kisi qurban úshin, al ekinshi bir kisi tek qana etin alý nıetimen ortaqtassa, shalynǵan mal barlyq ortaqtar úshin qurban bolyp eseptelmeıdi», - deıdi bas ımam.
