Óskemende qaýipti 81 elektr sháınek satylymnan alyndy

ÓSKEMEN. KAZINFORM – Óskemen qalasyndaǵy «Tehnodom» dúkender jelisinen tehnıkalyq reglament talaptaryna saı kelmeıtin 81 dana elektr sháınek satylymnan alyndy. Bul týraly Tehnıkalyq retteý jáne metrologııa komıtetiniń Shyǵys Qazaqstan oblysy boıynsha departamenti habarlady.

Azamattardan túsken shaǵym negizinde VITEK VT-1122 TR markaly elektr sháınek zerthanalyq synaqtan ótkizilgen. Tekserý nátıjesinde ónimniń qýaty Keden odaǵynyń «Tómen voltty jabdyqtyń qaýipsizdigi týraly» TR TS 004/2011 tehnıkalyq reglamentiniń talaptaryna sáıkes kelmeıtini anyqtaldy.

- Atap aıtqanda, 220 V kerneýde sháınek qýaty 1617 Vt bolǵan, bul belgilengen normadan 12,6%-ǵa kem. Al 240 V jaǵdaıda qýat 1824 Vt bolyp, 17,1%-ǵa tómen kórsetkish tirkelgen. Mundaı aýytqýlar tutynýshynyń qaýipsizdigine tikeleı qaýip tóndiredi, - delingen aqparatta.

Nátıjesinde «Tehnodom» jelisine bul modeldi satylymnan dereý alyp tastaý jáne jetkizýshige ónim jetkizýdi toqtatý týraly talap joldandy.

Komıtet ókilderiniń habarlaýynsha, tehnıkalyq reglamentterge saı kelmeıtin ónimdi saýdalaǵan tulǵalar men kompanııalar QR ÁQBtK-niń 415-babyna sáıkes ákimshilik jaýapkershilikke tartylady. Aıyppul kólemi sýbektiniń mártebesine qaraı 90-nan 600 AEK-ke deıin jetýi múmkin.

Tehnıkalyq retteý jáne metrologııa komıteti tutynýshylardy ónim sapasy men qaýipsizdigine muqııat bolýǵa jáne kúmándi taýarlar týraly ýákiletti organdarǵa habarlaýǵa shaqyrady.

Aıta keteıik, Óskemen dámhanasyndaǵy jappaı ýlanýǵa qatysty polıtsııa qylmystyq is qozǵady.