Óskemende qatty jelden 5 úıdiń shatyry búlindi

Qolaısyz aýa raıy, naqty aıtqanda qatty jel men naızaǵaı saldarynan Ahmer kentinde elektrmen jabdyqtaý jelilerin apatqa baılanysty ajyratý qajet boldy.

- Qatty jelden 5 turǵyn úıdiń shatyry zaqymdanyp, jeldiń kúshimen ushqan qurylys zattary elektr jelileri men oqshaýlaǵyshtardy búldirgen. Sonyń saldarynan elektrmen jabdyqtaý ýaqytsha toqtatyldy. Kóp uzamaı elektr jelilerin qalpyna keltirýge «ÓESK» AQ-nyń 3 avarııalyq brıgadasy jumyldyrylǵan, - dep habarlady qala ákimdiginen.

Kóp uzamaı elektr qýaty qaıta berile bastady.

- Sonymen qatar qatty jeldiń saldarynan 2 ýchaskede kóshe jaryǵynyń tirekteri búlindi. Qalpyna keltirý jumystaryna 2 brıgada jumyldyrylǵan. Budan bólek, qolaısyz aýa raıynyń saldarynan qalanyń birqatar ınfraqurylym nysandary da zaqymdandy. Aldyn ala málimet boıynsha, eshbir adam zardap shekken joq jáne avtokólikter de búlinbegen. Qolaısyz aýa raıynyń saldaryn joıý jumystary júrip jatyr, - delingen habarlamada.

Eske salsaq, osyǵan deıin Pavlodar oblysynda daýyldan 49 turǵyn úı búlingeni habarlanǵan.