Óskemende kásiporyndaǵy jarylysqa qatysty qylmystyq is qozǵaldy
ÓSKEMEN.KAZINFORM - Óskemen qalasynda «Kaztsınk» kásipornyndaǵy jarylysqa qatysty polıtsııa qylmystyq is qozǵady.
ShQO Polıtsııa departamenti baspasóz qyzmetiniń málimetine súıensek, apat saldarynan eki adamnyń qaza bolýyna baılanysty QR QK-niń eńbek qaýipsizdigi erejelerin buzý baby boıynsha qylmystyq is qozǵalyp, tergeý amaldary bastalǵan.
- Qazir oqıǵa ornynda jedel-tergeý toptary jumys istep jatyr. Barlyq mán-jaıdy anyqtaýǵa baǵyttalǵan shuǵyl tergeý áreketteri júrgizilýde. Ózge aqparatty QPK-niń 201-babyna sáıkes jarııa etýge tyıym salynǵan, - delingen aqparatta.
Eske salsaq, búgin tańerteń Óskemendegi kásiporynda jarylys boldy.
Sonyń saldarynan eki adam qaza bolyp, beseýi zardap shekti.
Premer-mınıstr Oljas Bektenov Óskemendegi jarylysty jeke baqylaýyna aldy.
Kásipornda aýa sapasyna tekserý júrgizilip, qorytyndysy jarııa etildi.
