Óskemende kásipker 4700 dollar utyp alǵanyn aıtqan alaıaqtarǵa qomaqty qarjy aýdarǵan
ÓSKEMEN. QazAqparat – Óskemen qalasyndaǵy jeke kásipker aqsha utyp alǵanyn aıtqan alaıaqtarǵa 200 myń teńge aýdaryp jibergen, dep habarlaıdy QazAqparat.
ShQO Polıtsııa departamenti baspasóz qyzmetiniń málimetine súıensek, kásipkerdiń «Vaıber» messendjerindegi akkaýntyna 4700 dollar utyp alǵany týraly habarlama kelgen. Alaıda ol aqshany alý úshin 200 myń teńge aýdarý kerek ekendigi jazylypty.
Budan bólek, qaladaǵy emhananyń dárigeri de kıberalaıaqtardyń qurbanyna aınalǵan. Belgisiz bireýler onyń uıaly telefonyna qońyraý shalyp, «qylmyskerler sizdiń banktik shotyńyzdaǵy aqshany sheship almaq bolǵan» dep aldaıdy. Buǵan sengen áıel alaıaqtarǵa barlyq málimetterdi aıta salady. Osylaısha jábirlenýshi 400 myń teńgege shyǵynǵa batqan.
«Atalǵan eki fakti boıynsha jedel izdestirý sharalary júrgizilýde», - delingen vedomstvo málimetinde.
