Óskemende qasaqana órt qoıylǵan kópqabatty úıden 15 adam qutqaryldy

ÓSKEMEN. QazAqparat – Óskemen qalasynda bireý qasaqana órt qoıǵan kópqabatty úıden 15 adam qutqaryldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgin qaladaǵy Qabanbaı batyr kóshesinde ornalasqan 6 qabatty turǵyn úıde órt shyqty. Oqıǵa ornyna qutqarýshylar shuǵyl kelip jetti.

«Órt sóndirýshiler barlaý júrgizip, úshinshi qabattaǵy páterdi qoıý qara tútin basqanyn kórdi. Eń aldymen olar avtosatynyń kómegimen 15 turǵyndy, onyń ishinde 4 balany qutqardy», - delingen aqparatta.

Odan keıin kópqabatty úıden 34 adam evakýatsııalandy. Onyń ishinde altaýy bala.

«Órt sóndirýshiler qoıý tútin arasynda otpen kúresýge jáne adamdardy qutqarýǵa májbúr boldy. Úılesimdi is-qımyldardyń arqasynda jalpy aýdany 40 sharshy metr tilsiz jaý tolyqtaı aýyzdyqtaldy. Zardap shekken eshkim bolǵan joq», - delingen habarlamada.

Qyzyl jalynmen kúreske barlyǵy 10 tehnıka jáne jeke quramnan 42 adam jumyldyrylǵan. Aldyn ala boljam boıynsha bireý páterge qasaqana órt qoıǵan.