Óskemende qarjy pıramıdasyna jarnama jasaǵan áıel jazaǵa tartyldy

ÓSKEMEN. KAZINFORM — Óskemen qalasynda qarjy pıramıdasynyń qyzmetin jarnamalaǵan áıel ákimshilik jaýapkershilikke tartyldy.

Shyǵys Qazaqstan oblystyq Ekonomıkalyq tergep-tekserý departamentiniń málimetinshe, LiveGood kompanııasynyń qyzmetinde qarjy pıramıdasyna tán belgiler bar. 

— Sot anyqtaǵandaı, 2024 jyldyń sáýir aıynda S. esimdi áıel áleýmettik jelide LiveGood kompanııasyna qatysty beınematerıaldar jarııalap, keńsesinde kezdesýler ótkizip, jańa múshelerdi tartqan. Sondaı-aq ol messendjerdegi chattarda kompanııa týraly foto jáne vıdeo materıaldar taratyp, halyqty onlaın-prezentatsııalarǵa shaqyrǵan, — delingen ShQO sotynyń baspasóz qyzmeti taratqan aqparatta.

Sot barysynda aıyptalýshy óz kinásin moıyndamady. Ol kompanııany qarjy pıramıdasy dep taný týraly resmı sot sheshimi joq ekenin alǵa tartty. Alaıda sot aıyptalýshyny kináli dep tapty.

— S.-nyń buryn quqyq buzýshylyq jasamaǵany isti jeńildetetin mán-jaı retinde tanylyp, salynǵan aıyppuldyń mólsheri 30 paıyzǵa qysqartyldy. Sot sheshimimen áıelge 412 860 teńge kóleminde aıyppul salyndy. Sonymen qatar oǵan úsh aıǵa deıin jelige materıaldar taratýǵa tyıym salyndy, — delingen habarlamada.

Eske salsaq, osyǵan deıin Óskemende kúıeýin pyshaqtap óltirgen áıel 8 jylǵa sottalǵany habarlanǵan.