Óskemende qarýly tonaýshyǵa qarsy turǵan áıel marapattaldy

ÓSKEMEN. QazAqparat - Óskemen qalalyq polıtsııa basqarmasy qolyna qarý alyp, dúken tonamaq bolǵan er adamǵa qarsy tura bilgen áıeldi batyldyǵy úshin marapattady, dep habarlaıdy QazAqparat.

29 jeltoqsan kúni polıtsııaǵa azyq-túlik dúkenine qaraqshylyq shabýyl jasalǵany týraly aqparat kelip túsken. Orta jas shamasyndaǵy belgisiz er adam myltyqqa uqsaıtyn zatpen dúken satýshysyn qorqytyp, aqsha talap etken.

«Áıel tonaýshydan qaımyqpaı, qarýyn tartyp alyp, basynan uryp jibergen. Mundaıdy kútpegen qaraqshy birden dúkennen shyǵyp, qasha jónelgen. Tártip saqshylary kóp uzamaı kúdiktini qolǵa túsirdi. 1965 jylǵy Óskemen qalasynyń turǵynyna qatysty QR Qylmystyq Kodeksiniń 192 jáne 287-baptary boıynsha sotqa deıingi tergeý júrip jatyr», – dep habarlady qalalyq polıtsııa basqarmasynyń baspasóz qyzmeti.

Basyna qaýip tónse de, batyldyq tanytqan Elmıra Ibragımqyzy Alǵys hatpen marapattaldy.

Sońynan anyqtalǵandaı, tonaýshynyń qolynda oq atýǵa jaramdy bir uńǵyly sholaq myltyq bolǵan.

Avtor: Talǵatjan Muhametbekuly