Óskemende qarttardy tonap kelgen jalǵan sheneýnik ustaldy
ÓSKEMEN. QazAqparat - Óskemende «jalǵan sheneýnik», Zyrıan aýdanynda «jalǵan polıtseı» ustaldy, - dep habarlaıdy QazAqparat tilshisi.
Oblystyq ІІD baspasóz qyzmetiniń habarlaýynsha, demalys kúnderi «102» nómirine alaıaqtyq týraly birneshe shaǵym túsken.
Jedel izdestirý kezinde 34 jastaǵy óskemendik jigittiń egde adamdarǵa ózin ákimdik ókili etip tanystyrǵany belgili boldy. Kúdikti qarttardyń senimine kirý arqyly aqshalaryn aldap alyp otyrǵan. Adanǵan qarııalar jalpy jıyny 300 myń teńge shyǵyn shekken.
Óskemen ishki ister basqarmasynyń qyzmetkerleri osy iske qatysty tergeý júrgizýde. Kúdiktiniń osyǵan uqsas ózge de isterge qatystylyǵy tekserilýde.
Al Zyrıan aýdanynyń turǵyny jurtqa ózin quqyq qorǵaý salasynyń ókili retinde tanystyrǵan. 29 jastaǵy jigit profılaktıkalyq jumys júrgizgen polıtseıdiń keıpinde birneshe páterge kirip, aqsha urlap otyrǵan.
«Tekserý barysynda «jalǵan saqshynyń» qýlyǵyna túsken 10 páterdiń ıesi anyqtaldy. Jalpy shyǵyn - 80 myń teńge. Zyrıan aýdandyq ishki ister bólimi onyń ózge de qylmystarǵa qatysy bar-joǵyn anyqtap jatyr», delingen oblystyq ІІD baspasóz qyzmeti taratqan aqparatta.
